မန္တလေး ဆေးရုံကြီးမှ သံသယစောင့်ကြည့်လူနာ (၅) ဦး ထပ်မံသေဆုံး

560

မန္တလေးအထွေထွေရောဂါကု ဆေးရုံကြီးမှာ ကိုဗစ် သံသယစောင့်ကြည့်လူနာ သီးသန့်ဆောင်က လူနာ (၅) ဦး ဧပြီ (၂၅) ရက်က ထပ်မံ သေဆုံးသွားတယ်လို့ မန္တလေးဆေးရုံအုပ်ကြီး ဒေါက်တာစုစုဒွေးက ပြောပါတယ်။

စောင့်ကြည့် လူနာတွေဟာ မူလကတည်းက ပြင်းထန်တဲ့ ရောဂါအခံရှိပြီးသူတွေ ဖြစ်ပြီး ကိုဗစ် ရောဂါ ဖြစ်ပွားနေချိန် ဖြစ်တာကြောင့် သူတို့ကိုလည်း သီးသန့်စောင့်ကြည့် ထားတာလို့ ဆိုပါတယ်။

“ဆေးရုံကြီးဆိုတဲ့အတိုင်း လူနာတွေက အများကြီးလာကြတယ်။ လာတဲ့ထဲက တော် တော်များများကို ကိုဗစ် သံသယအဖြစ် ထည့်တာပေါ့။ ဘာလို့လဲဆိုတော့ Positive ကို လွတ်မသွားစေချင်တဲ့ သဘောပဲ။

မတော်လို့ တစ်ယောက် Positive ဆိုတာ လွတ်သွားရင် တခြားလူအများကြီးကူးသွားမှာ စိုးလို့ ဒီထဲမှာ ထည့်ထားတာပေါ့။

အဲတော့ ပြည်သူလူထုအနေနဲ့ ကိုဗစ် သေတာလားဆိုတာမျိုး မထင်စေချင်ပါဘူး။ “ဆေးရုံအုပ်ကြီး ဒေါက်တာစုစုဒွေးက ပြောပါတယ်။

အဲဒီသေဆုံးလူနာတွေဟာ နှာစေး၊ ချောင်းဆိုး၊ ဖျားနာ၊ ကျောက်ကပ်၊ ဆီးချိုနဲ့ အသက်ရှူလမ်းကြောင်းဆိုင်ရာ ပြင်းထန်ရောဂါတွေ ဖြစ်ပွားနေသူတွေ ဖြစ်ပြီး ကိုဗစ် ရောဂါ ရှိမရှိ ဓာတ်ခွဲအတည်ပြုမှု အဖြေမှာတော့(၂) ယောက်က Negative ၊ ကျန် ( ၃) ယောက်က စစ်ဆေးဆဲ ဖြစ်တယ်လို့ သိရပါတယ်။

သေဆုံးလူနာတွေဟာ မန္တလေးတိုင်းဒေသကြီး မဟာအောင်မြေ မြို့နယ်၊ ပုသိမ်ကြီး မြို့နယ်၊ ချမ်းမြသာစည်မြို့နယ်၊ မတ္တရာမြို့နယ်နဲ့ စဥ့်ကိုင်မြို့နယ်တွေမှာ နေထိုင်သူကြသူတွေ လို့ သိရပါတယ်။

ဧပြီ (၂၄) ရက်ကလည်း တစ်ရက်အတွင်း(၇)ဦး သေဆုံးခဲ့ပြီး အဲဒီသူတွေ မှာ ကိုဗစ် ရောဂါရှိမရှိ အမျိုးသားကျန်းမာရေး ဓာတ်ခွဲမှုဆိုင်ရာဌာန NHL ကို ပေးပို့စစ်ဆေးခဲ့ရာမှာ (၄) ဦး ရောဂါပိုး မတွေ့ရ (Negative) အဖြေရရှီ်ကာ(၃)ဦးကတော့ စစ်ဆေးနေဆဲ ဖြစ်တယ်လို့ သိရပါတယ်။

လက်ရှိ စောင့်ကြည့်လူနာ(၃၂၅) ယောက် ထဲက (၁၈၃) ယောက်ဟာ Negative အဖြေနဲ့ ပြန်လည်သက်သာသွားပြီ လို့ ဆေးရုံအုပ်ကြီးက ပြောပါတယ်။ ဒါ့အပြင် မန္တလေးဆေးရုံကြီးက ကိုဗစ် သံသယစောင့်ကြည့် သီးသန့်ဆောင်မှာ ထားရှိကုသထားစဉ်အတွင်း သေဆုံးခဲ့သူ (၄၄) ယောက်ရှိပြီး အားလုံးဟာ Negative အဖြေထွက်ပြီးသူတွေလို့ သိရပါတယ်။

မန္တလေး အထွေထွေရောဂါကု ဆေးရုံကြီးမှာ ကိုဗစ် စောင့်ကြည့်လူနာတွေကို မတ်လ နောက်ဆုံး အပတ် က တည်းက လက်ခံထားရှိ ခဲ့တာပါ။

လက်ရှိ ဆေးရုံကြီးမှာ သံသယ စောင့်ကြည့်လူနာ (၉၂) ယောက်ကို စောင့်ကြည့်ထားတယ်လို့ မန္တလေး အထွေထွေ ရောဂါကု ဆေးရုံအုပ်ကြီးက ပြောကြားပါတယ်။

သတင်း – ဏေဏီ